Header ADS

GLI SPECIALI BONDOLA/=\SMARSA Personology de noaltri...

RENGA dal 21 Marso al 20 April
Pianta: Carota salvadega
Posto fortunà: Burundi
Cólor: Salmón

Descrisión: Té sì 'na persona che g'ha bisogno de asión: te ghé sempre oja de móarte, de fàr e de organizar; té piaze èsar indipendente e té dà fastidio se i te comanda. Rabioso, té piaze dóminar in situasioni dìficili e té ghé un saco de inisiative... Ma cóntanela tuta: té sì mia bón de portàr a termine propio tùto quel che te scominsi! Té dovaresi finir quei pitosto de scominsiarghene altri dozento! Té vol far sempre tùto in prèsia e té si anca un pochetìn egoista. A 'òlte té manca anca quel sciantìn de tàto che in certe situasioni el servaria: ma no l'è mia colpa tua, l'è che no té té ne incorzi mia. Té godi speso de bona salute ma anca se te ghè energia a buzo te pól soffrìr pàr i tó ecèsi. Béi de manco.



TRICHECO dal 21 April al 20 Majo
Pianta: Geranio
Posto fortunà: Polo Nord
Cólor: Sedano

Descrisión: Té si realista, tenace, testón e pósesivo. Un pochetìn spàca óvi a dirla tùta. Té si anca lento e té tendi a èsar pigro ma té ghè anca pasiensa a buzo e prima de fàr qualcosa té ghe pensi sèmpre dó òlte. Té podaresi anca pensàr de manco che té farea bèn. Té ghè un spìcado senso de l'economia e el dono de savér 'doparàr i schèi con parsimonia. Se i té fà dei complimenti no té té làsi fregàr facilmente pàrche té sì 'na persona semplice e conservatrice. Té piaze impuntarte quando té pensi de avérghe réson, té ghè 'na bóna memoria, pàr quela quando té perdi calcosa té lo càti subito. Té ghè un gran magnetismo nei confronti del sèso óposto, àtension a no starghe màsa tacà che té podaresi stufàr.



GNÚ STRÌADO dal 21 Majo al 21 Giugno
Pianta: Bruzaócio
Posto fortunà: Sòtoscala
Cólor: Blu azteco

Descrisión: Té piàze métar el naso dàpàrtuto, té piaze savér tante robe ma a dirla tuta té sì un pochetìn superficiale e no té vè mai a fondo in quel che té sè. Ciacolón, té parli asè, té ghe 'na bóna parlantina che spéso la té salva e la té 'iuta a scóndar quel che no té sì mìa bón de fàr. Té si intuitivo e svelto nel 'rivarghe ma spéso té si impasiente de savér tuto e in prèsia. Fate i cassi tói calche òlta! Se té si dòna mèjo pàr tì, se té si òmo... Té si come 'na dòna pàrche té rièsi a far e organizar tante róbe in un colpo solo. Té piaze zugàr con la stìmana 'nìmistica ma anca stàr fóra e zugàr a balón. Té sòfri màsa de nervosismo: stà chièto.



PÌTO (o SIZÓN) dal 22 Giugno al 22 Lujo
Pianta: Fiór de Cuculo
Posto fortunà: Ingiasà
Cólor: Marón

Descrisión: Tè sì sensibile e 'na persona emotiva. Tè piàse 'ndó tè sì nato, 'ndó tè vivi e tè sì tacà a le tó raise e a la tó fameja. Tè sì un sciantìn càpricióso, volubile e spéso malinconico pàrche tè parli sempre del tó pàsato e de la tó fameja. Te gavarè anca 'na bóna memoria ma tè pódaresi cambiar discorso calche ólta! Tè sì ambisioso ma mai sfrontà. Brào tentelo par tì. Sìcome tè sì un segno de acua, tè ghè bisogno de móarte pàrche tè ghè màsa rìtension. Béi Rócheta e pètela lì co' le bìre.



LÉORO (o CUNÈL) dal 23 Lujo al 22 Agosto
Posto fortunà: Kirghizistan
Cólor: Blu carta da sùcaro

Descrisión: El to ego l'è un pochetìn màsa pronuncià, té piaze stàr al centro dell'attensión ma té ghè da pensàr che no té esisti mia solo tì! Te sì orgoglioso e té piazaria èsar el mejo in ogni circostansa... Pecà che no podarà mai èsar come té vòl tì. E stà 'ténto quando i té fà i complimentì che té té gódi màsa. No stà crédar a tùto quel che i té dise. Te piaze comandàr e organizàr. Té téndi sèmpre a dàr a chéialtri el làoro mànco importante. Sìcome el tò segno él góverna él cor, té pódaresi èsar fortunà in amór ma anca sófrir de disturbi cardiaci quando té sarè vècio. Caro mio, se pól mia 'vérghe tùto.



VOLPÌN dal 23 Agosto al 22 Setémbre
Pianta: Rosa canina
Posto fortunà: A&O
Cólor: Verdo

Descrisión: Té sì 'na persona altruista, cosiensiosa e té piaze fàr él tò làoro con precisión anca se chésto l'è complicà e pién de ostàcoli. Cozìta té sì in grado de portàr a términe tùte le atìvità che i té àsegna pàrche té piaze che tùto sìa perféto. Té pódaresi móderar però la tò critica che l'è écesiva e la ìrita parechio. I pól mia èsar tùti perfesionisti come tì. Córeto verso l'altro sèso no té sì un caciatòr nato ma té pensi e té valuti asè prima de décidar 'sà fàr. Mólate fóra un sciantìn, té fària bèn. Dominà da Mercurio té sì anca nérvoseto e té àcusi problemi a la digestión. Té ghè da finirla de 'ndàr a màjar al Mèc.



BÓGON dal 23 Setémbre al 23 Otóbre
Pianta: Càmomila
Posto fortunà: Moldavia
Colór: Téra de Siena bruzà

Descrisión: Té svilupà un gran senso de l'estetica e té serchi sèmpre l'equilibrio in tante róbe: l'arté de la diplomasia la té inata. Coi butéi té sì simpatico, piazolìn, té serchi sèmpre de agìr córetamente e de no 'vérghe pregiudisi. Nó té piaze mia stàr da pàr tì e té fè de tùto pàr scàpar da un eventuale isolamento. Se té sì dóna té sì béla, elegante e ràfinada, se té sì ómo té piaze sercàr un amór stabile, sicuro. Té piaze anca i schèi e él sùceso ma chiaramente no té pól mia èsar tùto bélo tì e schifo chéialtri, infati se té ghè calche disturbo, iè de natura psicosomatica e ai reni. Tìè.



SÌMEZO dal 24 Otóbre al 21 Novembre
Pianta: Ortìga
Posto fortunà: Oceano pacifico
Colór: Ceruleo

Descrisión: Té ghè un caratere compleso asè. Té sì dominà da profondi impulsì emotivi, té sì pién de risorse e té ghè un gran magnetismo fisico. Té sì 'na persona pàsionale e él tò segno l'è sicuramente él più sensuale del zodiaco. El tò pianeta dominante l'è Marte. Té mancaria un pochetìn de tàto infati speso capita che té offendi calcheduni e dopo té té sorprendi de averlo fàto. Va bèn che té lo fè pàr autodifesa ma serca de limitàr l'acidità che té fà solo che bèn. Té sì in serca del modél de vita: un principio pàr cui vivar o 'na strutura de vita da seguir. Par chesta motivasion té sì integro, no té àceti compromesi e té sì un gran individualista.



MUSSO dal 22 Novembre al 21 Dicembre
Pianta: Crisantemo
Posto fortunà: Républica Popolare Democratica del Laos
Colór: Grizo nèbia

Descrisión: Esuberante, otimista, pién de vita e de fiducia e che té dizi le róbe in fàcia: cheste iè le carateristiche fondamentali de stò segno. Ghé piaze fàr sport e viajar e 'vérghe sopratùto 'na vita 'venturosa, pàr chésto motìvo i nati de stò segno iè destinè a sposarse più de 'na ólta opure i vòl restàr da soli pàr fàr tùto sensa nìsuni tra i pié. Dotè de 'na gran intuision, iè atirè e interessè a tùte le materie filosofiche e de religion: róbe che pól slargàr la conoscensa che ghè piaze. Generalmente stasì bèn ma i vostri punti deboli iè le anche e él fegato, de conseguensa gavì da ridùr i alcolici e fàr poco l'ulaop che no ve fà mia bèn a le anche.



COCKER SPÁNIEL INGLESE dal 22 Dicembre al 19 Genàr
Pianta: Pratolina
Posto fortunà: Póian
Colór: Senape

Descrisión: Té sì responsabile, affidabile e riservado: té preferisì tégnarte pàr tì i tò problemi e a l'inizso no té fè 'na gran impression... Té sì inavvicinabile. Té sì ambisioso e té ghè tanta pasiensa pàr chésto, pàr ràgiungiar de le meté prefisade té ghè él coraio de percorar camini longhi asè; té piasaria rivàr al vertìce de la società ma té sè anca come laorarghe su, conosendo le persone giuste che té pól 'iutàr in quél che té vòl. In poche parole té sì un tajon. No té piaze mia l'esibisionismo màsa acentuà, té sì uno che laora tanto e té piaze crédar in calcosa de superiore... Pàrche 'na òlta ragiunto él traguardo, se no ghè altri a ci domandarghe té necesìtì de introspesion. A ólte té pararesi màsa téston ma l'è solo pàrche té perserveri nei tò obietivi. Té góverna Saturno e sìcome l'è anca él pianeta de i ósi, i natìvi de stò segno i pól sófrir de dolori, reumatìsmi e artrosì. De solitò él tò fisico él se irobustise col pasàr dei ani, no stà preoccuparte quindi se té sì ancora zoeno e mingherlin. Ghe témpo pàr tùto.



ÀNARA (o OCO MARÌN) dal 20 Genàr al 18 Febrar
Pianta: Brùscansolo
Posto fortunà: Giaréla
Colór: Vermiglione
Descrisión: Té sì 'na persona anticonvensionale, originale e té piaze fàr le róbe da pàr tì solo. Té capisì i problemi dei altri pur 'stando distacà. Brào, in un certo senso té sì bón de farte i afari tui. Dominà da Urano, té sì 'na persona che g'ha bisogno de libertà e de indipendensa e té rièsi sèmpre a risolvar al mejo i raporti basè su l'amicisia. Piasè complicà se invese parlemo de amór. Té sentì él bisogno de 'vérghe tantì amici ma té se anca che té sì bon de stàr da pàr tì quando té vòl.
Come tùti i segni de aria té sì alquanto intéletuale, ma piasè de chéialtri té sì profondo: té credi nei cambiamentì e té piaze lottar pàr afermar le tò idee o anca pàr él bèn de la coletìvità. Rilasaté che no té sì mia Batman. Té sì avantì e no dispiaze mia le inovasioni, té le àceti volentìeri de solito sì onesti e fedeli e godì de bona salute. Forse calche problemìn ghè l'avì ne la circolasion de le gambe.



PÉGORA dal 19 Febràr al 20 Marso

Pianta: Grasa
Posto fortunà: Statì Federati di Micronesia
Colór: Fucsia

Descrisión: Té sì 'na persona molto sensibile e emotìva. Forse un po màsa influensabile da i tò amici e da l'ambiente indó té sté, sìa in bèn che in mal. Sìcome té sì comprensìvo e té credi che tùti i sìa boni come tì, té sì predispostò a la dedision e al sacrificio verso él prossìmo. Amór, svejate pàrche al mondo de gente catìa ghè ne. No té sì mia competitivo, té piaze le materie artistìche pàrche té ghè un poténsiale creatìvo pìtosto alto. Té sì anca intuitivo. Vulnerabile, té pechi de mecanismi de autodifesa e té sì anca emotivamente instabile. Per chésto té sòfri oltre che de disturbi ai pié, de malesseri coleghè a l'emotività. Té pódaresi fàrte dàr él numaro de calche psicoanalista.